Abul Yaqzan Ammar ɗan Yasir al-Anasi, wanda aka fi sani da Ammar Yasir, shi ne ɗan Yasir da Sumayya, shahidai na farko a Musulunci. Yayi shahada a ranar tara ga watan Safar na shekara ta 37 bayan Hijira a Yaƙin Siffin, yana yaƙi a ƙarƙashin tutar Amirul Mu’uminiin (A.S).
Bayan shahadar Manzon Allah (Tsira da amincin Allah su tabbata a gare shi da iyalansa), Ammar da farko yaƙi yin mubaya’a ga Abu Bakr domin nuna goyon baya ga Amirul Muuminiin (A.S). A lokacin mulkin Amirul Muuminiin (A.S), ya halarci Yaƙin Jamal da Yaƙin Siffin. Shahadarsa ta tabbatar da gaskiyar tafarkin Jagoran Masu Taqawa a Yaƙin Siffin, domin Manzon Allah (S.W) ya faɗa game da Ammar cewa: “Gaskiya tana tare da Ammar a duk inda yake.”
Kabarin Ammar yana birnin Raqqa na ƙasar Syria, kusa da kabarin Uwais al-Qarani.
Shauƙin Aljanna ga Ammar
Ammar ɗan Yasir, saboda cikakkiyar biyayyarsa ga Amirul Mu’uminiin (A.S), yayi adawa da halifofi a batun shugabanci. Tare da Salman, Abu Zahr da Miqdad, yana daga cikin ginshiƙai da farkon masu kafa tafarkin Shi’a.
Manzon Allah (S.W) ya ce game da Ammar da Sahabbansa na musamman: “Ya Ali! Aljanna tana shauƙin ganinka, da Ammar, da Salman, da Abu Zahr, da Miqdad.” [1]
Amirul Muuminiin (A.S) ya ce game da wannan: “An halicci ƙasa domin mutane bakwai, waɗanda ta dalilinsu ake azurta mutane, ake saukar da ruwan sama, kuma ake samun nasara: Abu Zahr, Salman, Miqdad, Ammar, Huzaifa, Abdullah ɗan Mas’ud, da ni, wanda ni ne Imamin su.” [2]
Kare Wilaya a Lokacin Shahada
Jaruntakar Ammar Yasir wajen kare wilayar Amirul Mu’uminiin (A.S) a Yaƙin Siffin tana daga cikin fitattun misalan biyayya da jarumta a tarihin Musulunci. Ammar ya tsaya da dukkan ransa tare da Amirul Mu’uminiin (A.S), ya kuma yi gwagwarmaya domin cimma manufofinsa, har ya sadaukar da ransa a wannan tafarki mai girma.
A rana ta tara ta yaƙin, Ammar ɗan Yasir ya ji rauni a tsakiyar fagen fama kuma yayi shahada. Lokacin da ya ga tutar Amr ɗan As a fagen yaƙi, ya ce: “Wallahi, na yi yaƙi da wannan tuta a yaƙe-yaƙe uku, amma wannan yaƙin bai fi waɗancan ukun kasancewa a kan shiriya ba.”
Sannan Ammar ya rera waɗannan baitoci:
“A baya mun yaƙe ku saboda saukar Al-Qur’ani, kuma yau mun yaƙe ku saboda ingantacciyar fassara da ta’awilinsa; yaƙin da yake raba kawuna da jikuna, ya kuma raba masoya da juna, ko kuma ya mayar da gaskiya zuwa tafarkinta na asali.”
Lokacin da ƙishirwa tayi wa Ammar yawa, ya nemi ruwa. Sai wata mace mai dogayen hannaye ta zo wajensa; ban sani ba ko tana ɗauke da babban kwano ne ko ƙaramin salka mai ɗauke da ɗan madara. Bayan ya sha, Ammar ya ce:
“A yau Aljanna tana ƙarƙashin inuwar māsuna. A yau zan haɗu da masoyana, wato Muhammad (S.W) da Sahabbansa. Wallahi, ko da sun kori mu har zuwa gonakin dabinon Hajar, muna da tabbacin cewa mu muna kan gaskiya, su kuma suna kan ɓata.” [3]
Shahadar Ammar da Makircin Mu’awiya
Daya daga cikin makircin Mu’awiya a tsakiyar Yaƙin Siffin shi ne ƙoƙarinsa na ɗora laifin shahadar Ammar Yasir a kan Amirul Mu’uminiin (A.S). Mu’awiya yayi ƙoƙarin ƙirƙiro hujjoji da bayanan ƙarya domin ya nuna cewa Jagoran Masu Taqawa ne ya haddasa wannan lamari, don ya ɓata mutuncinsa a tsakanin Musulmi.
A lokacin shahadar Ammar, Abdullah, ɗan Amr ɗan As, ya ce wa mahaifinsa cikin tausayi: “Shin kun kashe Ammar, alhali Manzon Allah (S.W) ya ce ƙungiyar masu tawaye ce za ta kashe Ammar, kuma wanda ya kashe shi zai shiga Wuta?”
Amr ya ce wa Mu’awiya: “Kana jin abin da Abdullah yake faɗa?”
Mu’awiya ya amsa: “Wanda ya kashe shi shi ne wanda ya kawo shi fagen yaƙi!”
Wannan magana ta bazu a tsakanin mutanen Sham, har daga ƙarshe ta kai kunnen Amirul Mu’uminiin (A.S). Imam ya amsa da hujja mai ƙarfi:
“Idan wannan tunani daidai ne, to Manzon Allah (S.W) ne ya kashe Hamza (Amincin Allah ya tabbata a gare shi), domin shi ne ya kawo shi fagen Yaƙin Badr!” [4]
Matsayin Ammar a Cikin Kalmomin Jagoran Masu Taqawa
Amirul Muuminiin (A.S), yayin ambaton sharuɗɗan sulhun Mu’awiya, ya tuna Ammar da alheri, ya ce:
“A cikin wasu sharuɗɗan sulhu, Mu’awiya ya nemi in miƙa masa wasu zaɓaɓɓu kuma nagartattun Sahabban Manzon Allah (S.W), kuma Ammar ɗan Yasir yana cikinsu. Allah Ya jiƙan Ammar; amma ina za a sami irin sa? Mun kasance muna ganinsa tare da Manzon Allah (S.W), ta yadda idan mu biyar ne a sahun gaba, Ammar ne na shida, kuma idan mu huɗu ne, shi ne na biyar. Mu’awiya ya sanya a cikin sharuɗɗan sulhun cewa zai kashe waɗannan Sahabbai kuma ya rataye su.” [5]
Haɗuwar Imani da Zatin Ammar
Amirul Mu’uminiin Ali (A.S) koyaushe yana jaddada ƙarfafan imanin Ammar. Abu Amr al-Kindi, ɗaya daga cikin sahabban Imam Husseini (A.S), ya ruwaito cewa wata rana muna tare da Amirul Mu’uminiin (A.S), kuma mutane suka gan shi cikin walwala da farin ciki. A wannan hali, suka roƙe shi ya ba su labarin Ammar ɗan Yasir.
Imam ya ce:
“Shi mutum ne wanda Allah Ya haɗa imani da namansa, fatarsa da gashinsa.ta yarda Duk inda ya tafi, imani ma yana tafiya tare da shi. Bai dace ba kuma ba zai yiwu ba wutar Jahannama ta jawo shi zuwa gare ta ta haɗiye shi.” [6]
Binne Ammar da Jagoran Masu Taqawa Yayi
Lokacin da Ammar yayi shahada a Yaƙin Siffin, Amirul Muuminiin (Amincin Allah ya tabbata a gare shi) yayi masa sallar jana’iza.
Bayan shahadar Ammar, Imam ya karanta waɗannan baitoci a kusa da gawarsa:
“Ya mutuwa, wadda tabbas za ki zo gare ni ma, ki hutar da ni, domin kin ƙwace mini dukkan abokaina. Ina ganin kina bibiyar waɗannan abokaina da matuƙar lura, kamar kina nemansu da fitila a hannunki.” [7] [8]
Majiyoyi
[1] Rawdat al-Wa’izin, juzu’i na 2, shafi na 280.
[2] Al-Khisal, juzu’i na 2, shafi na 360.
[3] Waq’at Siffin, shafi na 340.
[4] Kashf al-Ghumma fi Ma’rifat al-A’imma, juzu’i na 1, shafi na 260.
[5] Sharh al-Akhbar fi Fada’il al-A’imma al-Athar, juzu’i na 1, shafi na 345.
[6] Al-Gharat, juzu’i na 1, shafi na 177.
[7] Ibn Sa’d, Al-Tabaqat al-Kubra, Dar Sadir, juzu’i na 3, shafi na 262.
[8] Al-Majlisi, Bihar al-Anwar, 1403 bayan Hijira, juzu’i na 33, shafi na 19.
