Atabatul Alawiyya Mai Tsarki, ta kammala tsarinta na musamman na karbar bakuncin iyalai na shahidan makarantar “Shajareh Tayyibaeh” a birnin Minab na Iran bayan kwanaki da dama; shirin da aka tsara a cikin tsarin nuna jin dadin sadaukarwar shahidai da kuma karrama iyalansu masu daraja.
Haka nan kuma, an samar da dukkanin ayyukan hidima da tallafin da ake bukata don jigilar wadannan iyalai daga wuraren zamansu a Iran zuwa Iraki da kuma komawarsu ta hanyar Filin Jirgin Sama na Kasa da Kasa na Najaf al-Ashraf. A wajen bikin yin bankwana da ayarin iyalan shahidan, “Haidar al-Isawi”, mamba na kwamitin gudanarwa na Atabatul Alawiyya Mai Tsarki, ya halarta. Wannan shiri, wanda ya kunshi iyalai sama da 100 da mutane sama da 350, ya hada da gudanar da wani biki na hukuma na girmamawa da karramawa wanda Atabatul Alawiyya Mai Tsarki ta nuna jin dadinta kan sadaukarwar shahidai da iyalansu a ciki. Wannan shiri a tsawon mako daya, ya kuma samar da ziyarar Ataba da wurare masu tsarki na Iraki ga mahalarta.
Wadannan ziyarce-ziyarce sun hada da Haramin Amirul Muminin Ali (Amincin Allah ya tabbata a gare shi) mai tsarki, Babban Masallacin Kufa, Haramin imam Husseini da Abul fadal Abbasi mai tsarki a Karbala mai alfarma, da kuma ziyartar Haramin Imamai Kazimiyya (Amincin Allah ya tabbata a gare su) mai tsarki a Kazimiyya da kuma Haramin Imamai Askariyyain (Amincin Allah ya tabbata a gare su) mai tsarki a Samarra.
Iyalan bakin sun kuma nuna godiya da yabawa ga Atabatul Alawiyya Mai Tsarki sakamakon kyakkyawan tarba da ci gaba da bayar da hidima da tallafi a tsawon lokacin wannan tafiya, kuma sun jaddada cewa wannan mataki ya bar tasiri mai zurfi na ruhi a kan zukatansu, ya rage radadin da ke tattare da rashin masoyansu, kuma ya raya tunawa da sadaukarwar ‘ya’yansu shahidai. An gudanar da wannan karbar bakuncin ne a cikin tsarin wata yarjejeniya ta hadin gwiwa wadda Hukumar Atabatul Alawiyya Mai Tsarki ta sanya hannu domin bayar da hidima ga iyalan shahidai da wadanda abin ya shafa, a lokacin wata ziyara a wasu garuruwan Iran da yaki ya shafa.
Wannan yarjejeniya ta kunshi tsara tafiye-tafiyen ziyara zuwa Ataba masu tsarki na Iraki domin iyalan shahidai, har da iyalan shahidai na wannan makaranta da abin ya shafa, da kuma bayar da agajin jin kai da na ceto ga iyalan da abin ya shafa, shiga cikin sake ginawa da yin ado da zinare na Maqamin Sayyid Muhammad bin Imam Musa Kazim (Amincin Allah ya tabbata a gare su) a birnin Dezful, gami da bayar da sauran ayyukan jin kai.
