Cibiyar “Nazm” ta Sashin Dabarun Tsare-tsare da Bunƙasa na Atabutul Alawiyya, a daidai lokacin tunawa da haihuwar Manzon Allah (Tsira da amincin Allah su tabbata a gare shi da iyalansa) da Imam Ja’afar As-Sadiq (Amincin Allah ya tabbata a gare shi), ta shirya wani biki domin karrama ɗalibai masu hazaka da suka yi fice daga cikin ’ya’yan masu hidimar Amirul Mu’uminin Imam Ali (Amincin Allah ya tabbata a gare shi), a matakan karatun da suka kammala. An gudanar da bikin ne a zauren Sayyada Amina (Amincin Allah ya tabbata a gare ta), a farfajiyar Sayyada Zahra (Amincin Allah ya tabbata a gare ta), tare da halartar mataimakin mai kula da Ataba da wasu mambobin kwamitin gudanarwa.
An fara bikin da karatun ayoyi daga Alƙur’ani Mai Girma. Daga nan, Mustapha Mani, mamba a kwamitin gudanarwa, ya gabatar da jawabi inda ya jaddada kulawar mai kula da Atabutul Alawiyya wajen tallafawa da ƙarfafa fitattun ɗalibai daga ’ya’yan masu hidima. Ya bayyana cewa wannan mataki na nuna godiya ne ga ƙoƙarinsu na ilimi, tare da ƙarfafa musu gwiwa domin su cigaba a tafarkin nasara da ƙwarewar ilimi.
Wissam Iskandar, shugaban Cibiyar “Nazm” ta Sashin Dabarun Tsare-tsare da Bunƙasa, ya bayyana cewa: “An gudanar da wannan biki ne bisa umarnin mai kula da Atabutul Alawiyya, a daidai lokacin tunawa da haihuwar Manzon Allah (Tsira da amincin Allah su tabbata a gare shi da iyalansa) da jikan Manzon Allah mai girma, Imam Ja’afar As-Sadiq (Amincin Allah ya tabbata a gare shi).”
Ya ƙara da cewa: “A wannan biki, an bai wa fitattun ɗalibai sama da 225 daga makarantu daban-daban na birnin Najaf al-Ashraf kyaututtuka. An yi hakan ne domin nuna godiya ga ƙoƙarinsu wajen neman ilimi da kuma ƙarfafa musu gwiwa su cigaba da samun nasara da ci gaban karatu.”
Iyayen ɗaliban da iyalansu sun kuma miƙa godiya ga Atabutul Alawiyya saboda kulawa da tallafawar da take bai wa ’ya’yan masu hidimar Amirul Mu’uminin Imam Ali (Amincin Allah ya tabbata a gare shi). Sun kuma jaddada muhimmancin irin waɗannan shirye-shirye wajen ƙarfafa ɗalibai su cigaba a tafarkin nasarar karatu.
An gudanar da wannan bikin karramawa a cikin shirye-shiryen Makon Sadiqain na Duniya karo na biyar. Mataki na farko na wannan shiri ya ƙunshi karrama fitattun ɗalibai mata da maza da suka kammala makarantar firamare, yayin da daga baya za a gudanar da bukukuwa domin karrama ɗalibai masu hazaka a matakan sakandare. Ana aiwatar da waɗannan shirye-shirye ne a cikin tsarin Atabutul Alawiyya na kulawa da wannan rukuni da tallafa wa tafarkinsu na ilimi.
