Tawagar Atabutul Alawiyya a birnin Lahore na Pakistan ta fara rarraba takardun gayyata na musamman ga baƙin bikin. Za a gudanar da bikin ne a munasabar tunawa da haihuwar Manzon Allah Muhammad (Tsira da amincin Allah su tabbata a gare shi da iyalansa) da jikansa mai girma, Imam Ja’afar As-Sadiq (Amincin Allah ya tabbata a gare shi), a cikin shirye-shiryen “Makon Sadiqain na Duniya”.
Muhannad al-Jamali, wakilin Sashen Hulɗa da Jama’a na Ataba, ya bayyana a wata hira da Cibiyar Labarai cewa: “Bisa umarnin mai kula da Atabutul Alawiyya, an miƙa takardun gayyata na musamman na ‘Taron Tsarkakan Biyu’ ga wakilin Babban Marja’iyyar Addini, shugabannin makarantu da cibiyoyin addini, zamantakewa da jami’o’i da wakilansu, tare da wasu fitattun malaman addini. An gudanar da wannan mataki ne tare da haɗin gwiwa da daidaitawa da Cibiyar ‘al-Minhaj al-Husseini’ a birnin Lahore, babban birnin jahar Punjab.”
Al-Jamali ya ƙara da cewa: “Shirin biki da tunawa da wannan munasaba mai albarka ya ƙunshi shirye-shirye daban-daban, ciki har da ɗaga tutar tabarruki a wannan birni da wani taro kan zaman tare cikin lumana da yaƙi da ra’ayoyin wuce gona da iri, wanda za a gudanar tare da halartar wakilai daga mazhabobi da ƙabilu daban-daban a Pakistan. Haka kuma, za a gudanar da wani biki na musamman ga mata muminai, tare da wasu shirye-shirye da bayanai daban-daban na al’adu da addini.”
Ana gudanar da waɗannan shirye-shirye ne domin ƙarfafa hulɗar addini da zamantakewa, tabbatar da ƙimar haɗin kai, zaman tare da zaman lafiya, da kuma tunawa da munasabobin da suka shafi haihuwar Manzon Allah (Tsira da amincin Allah su tabbata a gare shi da iyalansa) da Imam Ja’afar As-Sadiq (Amincin Allah ya tabbata a gare shi).
